These verses o J. B. Selkirk stairt whan things war gey bad in the Borders. Wark wis kin o scarce, an if ye war lucky enough tae hiv wark ye got gey little recompence for teirin yer guts oot afore the cock crawed the late at nicht. Ah weel, that wis the chance for the emmigration agents, ower thay come an thay got in amang the Robsons, an the Scotts an the Elliots an aw the hard wirkin Border breed an thay tell thaim the grandest story aboot a laund flowin wi milk an hinnie ower the sea. Ay, ay, oh ay, thay only got tae wirk twa oors a year, ye ken, ye mak a fortune an come back tae thair beluvit Border laund. Oh, weel, the twa heid o thaim teuk the bait an awa thay went, ay, this in ane o thaim writin tae his pal in Selkirk tellin him the sad sad story o thair disillusionment, an whit the blakety-blank thay wad dae wi the immigration agent if thay got a haud o him, if thay haed him roond the neck. An he, he gets on aboot the auld days, he says, heh, he says:
Ye mynd o fishin, you and me
We haed been catchin twa or three
Amang the rocks ahint Brigend.
Whan, reachin ower, wi extrae bend
A slippit on a muckle stane,
And broke, ye mynd, ma collar-bane.
A'v niver been laid up sin syne.
Nor yet afore, that A can mynd.
Than he gets on aboot the auld ploys awa at the heid o Ettrick yonder, an he mentions the auld kirkyaird, ye ken? Aboot three an a hauf mile abuin Tushielaw whaur aw the celebrities are laid tae rest, ye ken? Tibbie Shiels an Doctor Boston an Willie Philip an James Hogg, ay, ay, he gets on aboot yon bieldy corner yonder and he says in thae twa grand lines, he says, yon bieldy corner whaur
A wad rather lie within the year
Than be Methuselah oot here.
An he tells aboot bein no sae weel, an he went tae the doctor an o coorse the doctor bein a Scots doctor wis a verra discernin chap, ay he diagnosed the tribble richt awa, that a guid ane, diagnosed, eh? Ay, diagnosed the tribble richt awa, whit's wrang wi you ma man, he says, ye're hameseek. He says, the only cure for that is back tae whaur ye belang in the Borders sae he writin tae his pal in Selkirk tellin him the gled news that he's comin hame, heh, he says:
A'm better fettelt, no sae yallae,
That doctor chield's a cliver fallae.
Oh, an he's leukin forrit tae comin hame an than he tells, he describes the laund o his adoption in thae grand lines o J. B. Selkirk's, he says:
The kintra here's a perfect staw,
It's no the least like oors ava;
A level plain withoot a bend on't,
Wi nae beginnin an nae end on't;
As faur as the ee can leuk upon,
The land's as flat as a baurleyscone.
The watter tae, sae douf an dule,
No here a stream an thare a puil;
Until ye test it wi a straw,
Ye haurdly ken it rins ava.
an than, in these glorious verses, the picture that's been in his mind's eye, aw the years he's been awa frae the Borders, he says;
Ah, Tam! gie me a Border burn
That canna rin withoot a turn,
An wi its bonnie babble fills
The glens amang oor native hills,
Hou men that ance have kenned aboot it
Can leeve thair efterlifes 'ithoot it,
A canna tell, for day an nicht
It comes uncawed for tae ma sicht.
A see't this moment, plain as day,
As it comes bickerin ower the brae,
Atween the clumps o purple heather,
Glistenin in the simmer wather,
Syne divin in belaw the grund,
Whaur, hidden frae the licht an sun,
It gibbers like a deid man's ghost
That clamours for the licht it's lost,
Till out again the lowpin limmer
Comes dancin doun throu shine an shimmer
At heidlang pace, till wi a jaw
It jumps the rocky watterfaw,
An cuts sic cantrips in the air,
The pictur pentin man's despair;
A rowantree buss oot ower the tap o't,
A glessy puil tae kep the lap o't,
While on the brink the blue harebell
Keeks ower tae see its bonnie sel.
An sittin chirpin aw its lane,
A watter-waggie on a stane,
Ay, penter lad, thraw tae the wund
Your canvas, this is holy grund:
Wi aw its highest airts achievin,
The pictur's deid, but this is leevin.